កំពង់ស្ពឺ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានបញ្ជាក់ថា ក្នុងអាណត្តិនេះគឺជាអាណត្តិដែលត្រូវពង្រឹងច្រើនជាងពង្រីក ក្នុងន័យថាពង្រឹងនៅសមត្ថភាពនៃការដឹកនាំក៏ដូចជាការបម្រើលើសេវាសាធារណៈជាជាងក្នុងការពង្រីកបន្ថែមនៅមន្ត្រីដែលមិនចាំបាច់។
ថ្លែងនៅក្នុងពិធីសម្ពោធឱ្យប្រើប្រាស់ជារដ្ឋបាលសាលាខេត្តកំពង់ស្ពឺ ព្រឹកថ្ងៃច័ន្ទ ទី៣០ ខែតុលា ឆ្នាំ២០២៣ សម្ដេចធិបតីបានលើកឡើងថា រដ្ឋាភិបាលក្នុងអាណត្តិរបស់សម្ដេចគឺត្រូវពង្រឹងទៅលើវិស័យ អប់រំ សុខាភិបាល និងវិមជ្ឈការ ដើម្បីធានាប្រសិទ្ធភាពកាន់តែល្អ។
សម្ដេចថា៖ «ឆ្នាំ២០២៤ ជាឆ្នាំដែលចាប់ហ្វ្រាំង និងវាយតម្លៃ»។
សម្ដេចថា ការពង្រីកគឺត្រូវធ្វើតាមតម្រូវការជាក់ស្ដែង។ ជាពិសេសគឺថ្នាក់ក្រោមជាតិដែលនាពេលខាងមុខក៏នឹងមានការផ្ទេរសិទ្ធិពីខេត្ត ទៅថ្នាក់ក្រោមទៀតផងដែរ៕
